Routes2Ride - Sustrans

Nôl

Taith Taf: Caerdydd - Aberhonddu

Sylwadau

Mae’r daith anhygoel hon yn dechrau ym mhrifddinas ffyniannus Cymru gyda phrif atyniadau megis Castell Caerdydd, Stadiwm y Mileniwm a Bae Caerdydd.

Mewn taith fer ar eich beic cewch eich cludo o Gaerdydd cosmopolitanaidd i nefoedd cefn gwlad. Yn gyntaf byddwch yn beicio wyth milltir hamddenol coridor Afon Taf i dir o goredau byrlymus llawn bywyd gwyllt, cefnlenni mynyddig trawiadol a chastell tylwyth teg (Castell Coch).

Ar y llwybr mae digonedd o gyfle i aros am bicnic cyn cyrraedd tref treftadaeth ddiwydiannol Pontypridd, tref enedigol y canwr byd enwog Tom Jones, lle ceir amgueddfa, yr hen bont bridd a Pharc Coffa Ynysangharad.

Oddi yma mae’r llwybr yn canghennu i lwybrau eraill megis y Lôn Geltaidd - gyda digon o atyniadau yn cynnwys Parc Treftadaeth y Rhondda yn Nhrehafod lle byddwch yn camu yn ôl mewn amser ac yn cael profiad o fywyd dan ddaear ym Mhwll Lewis Merthyr gyda chymorth tywysydd a arferai fod yn löwr.

Yn ôl ar y llwybr, ewch i gyfeiriad Merthyr Tudful, tref a godwyd ar haearn a glo, a chartref ysblennydd Castell Cyfarthfa. Arhoswch yma i ymweld ag amgueddfa ac oriel luniau’r Castell cyn mynd ymlaen i Aberhonddu drwy dirweddau mynyddig godidog, heibio i raeadrau ewynnog a chronfeydd dŵr crisial cyn cyrraedd tref Aberhonddu - gyda’i Chadeirlan a digonedd o dafarndai a siopau llawn cymeriad. Dringwch yn raddol i fyny Bwlch Torpantau a darganfod hen Reilffordd Merthyr cyn cyrraedd cefn gwlad hudolus yng Nghanol Parc Cenedlaethol Bannau Brycheiniog.