Routes2Ride - Sustrans

Nôl

Lôn Las Cefni: Ynys Môn

Sylwadau
Gweld map

Gan ddechrau ym mhentref Malltraeth a’i leoliad hyfryd yng nghornel de orllewinol yr ynys, mae’r llwybr yn mynd ar hyd Cors Malltraeth i Bont y Marcwis lle mae’r llwybr di-draffig yn dechrau. Mae’r adran hon o’r llwybr bron yn dair milltir o hyd mewn llinell hollol syth, felly gwae chi pan fydd y gwynt yn eich erbyn!

Ar ôl croesi dros yr A5 ac o dan gefnffordd yr A55, mae’r daith yn croesi lein rheilffordd segur Cangen Amlwch cyn mynd ymlaen i Langefni ar hyd glan Afon Cefni. Ceir digon o fannau i fwyta a chael cyflenwadau yn yr hen dref farchnad hon cyn parhau ar y daith i gyfeiriad y gogledd.

Mae’r daith yn eich arwain i warchodfa natur leol Nant y Pandy sydd â llwybrau estyllod ychwanegol a cherfluniau i gyfoethogi’r daith. Wedi mynd dan lein Cangen Amlwch byddwch wedyn yn beicio uwchben Afon Cefni ar lwybr estyllod trawiadol cyn cyrraedd glan Llyn Cefni, cronfa ddŵr a gwarchodfa natur leol. Wrth argae’r gronfa gallwch fynd i gyfeiriad y dwyrain i gysylltu â Llwybr Cenedlaethol 5 neu fynd am y gorllewin i orffen y daith ym mhentref Bodffordd.

O bentref Malltraeth mae’n bosibl teithio i’r cyfeiriad arall ar draws Cob Malltraeth i Goedwig Niwbwrch. Mae Lôn Las Cefni yn rhedeg drwy’r goedwig, sy’n enwog am ei phoblogaeth o wiwerod coch, i bentref Niwbwrch, neu gallwch barcio eich beic a mynd i draeth Niwbwrch.

Am ragor o wybodaeth gweler map beicio Lôn Las Cymru - Gogledd neu daflen Teithiau Beicio Gwledig yn Ynys Môn.